Introduction

Nimes!

Linguisticamente, Francia es dividite principalmente in duo. Al nord, on trova le terras que originalmente parlava linguas d’oïl e, in le medietate sud, on trova le linguas d’oc. Iste nomines veni ab lor manieras de dicer le adverbio affirmative ‘si’. Iste forma de nominar iste linguas es creation del grande poeta italian Dante Alighieri. In su famoso tractato De vulgari eloquentia (Del parlar vulgar, isto es, vernacular, non latin), ille parlava de tres linguas romance parlate in su epocha in le Europa meridional. Le lingua d’oïl, ubi le francese antique formava le standard de celle hodierne; le lingua d’oc, inter cuje descendentes on trova le occitano o le catalano; e, finalmente, le sue, le italiano, nominate lingua del sì.

In le Inferno, le prime parte de su opus magnum Le Divin Comedia, le autor parla de su terra, Italia, assi:

del bel paese là dove ’l sì suona.

Io non crede que iste verso italian besonia traduction, mais io non vole que le lector sia irate, igitur ecce illo:

del pais belle, la ubi le si sona.

Iste medietate sud, debite a que illo parla le lingua d’oc, es cognite como

Occitania

Ci, le grecos establiva le importante colonia de Massilia, appellate hodie in francese Marseille. Le romanos, qui commerciava con iste citate, consequeva un accordo con illo: Roma darea protection e Massilia darea un parve portion de terra, e assi le Republica poterea construer stratas pro conectar con Hispania. Alora, circumdante Massilia, Roma fundava le provincia Gallia Narbonensis. E ci, inter le citates per illes fundate, on trova Nemausus, le nomine latin de lo que in interlingua es appellate Nimes, le Roma francese.

Vidente locos como le Porta de Augusto, le Arenas o le Casa Quadrate, re le quales nos parlara plus detaliatemente depois, on pote comprender le supernomine que io lo dava, le Roma francese.

Multo presso a mi hodierne casa, on pote trovar le Via Domitia. Isto es le strata que le romanos construeva pro connecter Italia con Hispania, e que besoniava ser construite trans le colonia grec de Massilia, le qual nos ja ha nominate.

Summario Historic

Ab su fundation, Nimes deveniva un urbe importante per centurias pro Roma, usque le invasiones barbar lo faceva cader. In le quinte seculo, Odoacre, le chef del herulos, deponeva le ultime imperator del Imperio Roman de Occidente, le infante (contava solmente undece annos) Romulo Augusto, supernominate Augustetto. Quatro annos ante, le citate de Nimes ja esseva totalmente in manos del visigothos, regnate per Eurico.

Duo centurias e medie plus tarde, in 725, le citate cadeva in manos del Caliphato Omayad e esseva quasi destruite. Mais solmente un generation plus tarde, in 752, le musulmanos esseva expulsate per Pipino le Breve, rege del francos.

Alcun centurias esseva troppo difficile pro Nimes, que suffereva le peste e le guerras del religion, nam le urbe deveniva bastion del protestantismo in Francia.

Fortunatemente, ab le seculo XVIIe, le citate ha fruite principalmente de periodos de floration.

Monumentos

Le citate de Nimes ha parcos e ecclesias bellissime, como le Cathedral de Nostre Seniora e Sancte Castor, le qual ja face de iste urbe un loco belle a vider. Mais lo que lo face ser un secunde Roma es su monumentos de epocha e inspiration classic. Ci on va parlar re tres de illos: le Arenas, le Casa Quadrate e le Jardines del Fontana.

Le Arenas

Ecce le amphitheatro de Nimes, un del melior conservates del mundo roman. Anque, con su 133 metros de longor e su 101 metros de largessa, con un arena de 68×38 metros, illo es un del vinti plus grande del quatro centos amphitheatros roman remanente. Constructe poco post celle del Urbe Eterne, illo esseva un arena ubi gladiatores luctava, o contra altere gladiatores o mesmo contra animales. Iste tradition gladiatori finiva con le arrivata del christianismo. E ben que io nunquam lo ha experite, so secur que on poterea finir in prision si on lo experi hodie!

Mais isto non vole dicer que io non ha entrate ibi. Le dies 21 e 22 de septembre (iste articulo esseva scripte in 2024) on celebrava le Jornatas Europee del Patrimonio (JEP). Celle dies, omne edificio de relevantia cultural, como monumentos e museos, esseva aperite de maniera gratuite. E io pote assecurar vos que illo es vermente grande, con spatio pro usque 24000 spectatores. E isto, io pote assecurar vos per experientia, es un loco magnific pro un joco de attrappar!

Le Casa Quadrate

Appellate la Maison Carrée in francese, isto esseva un templo del culto imperial de mesura medie. De stilo toscan, como describite in le scripturas de Vitruvio, scriptor roman contemporanee de architectura, mesmo si illo usa le ordine corinthie. Super un podium de 2,85 m de altitude, e con dimensiones de 26,42 m per 13,54 m, formante un rectangulo quasi duo vices tanto longe quanto large. Le faciada contine un profunde portico o pronao que es quasi un tertio del longitude del edificio e es ricamente decorate in terminos de columnas e capitellos. Con un portico con sex columnas corinthie sub le fronton e vinti columnas incorporate al muros del cella. Un grande porta conduce al interior parve, ubi esseva le sanctuario. Ora, illo es usate pro projectar un film re le historia roman de Nimes. Nulle decoration ancian remane in le cella.

Le Jardines del Fontana

Iste parco public es un belle loco, plen de elementos classic ubi, anque per experientia, on pote haber un belle e dulce picnic. Mesmo si grande, il es difficile camminar per plus de un minuta sin trovar elementos del mundo roman. In le parte plus basse, nos pote trovar alcun sculpturas del mythologia roman in prime loco. Depois, on trova le Sanctuario del Fontana, que conta con le belle Templo de Diana, dea del chassa, e con le sculpturas de elegante nymphas. Si nos ascende le collina, dominante le parco e le citate ipse, on trova le turre Magne, de erection pre-roman e transformate in tempores augustee.

Nos poterea parlar ancora plus re le distincte sculpturas de imperatores que on trova per le citate o del ja nominate Porta de Augusto (illo ipse con un statua del magne Augusto), mais le articuletto solmente da pro parlar, e pauperemente, re le plus importantes.

Preter Roma

Mais le major parte del historia de Nimes ha evenite postquam tempores roman.

Inter le elementos urban recente plus relevante, a medie cammino inter le station e le Arenas, on debe passar trans le Esplanada de Charles de Gaulle, con le nomine del figura militar e politic plus importante del Francia post-bellic. Mais, guai, nam mesmo ci on trovara ancora elementos roman! Domina le esplanada le Fontana de Pradier (nominate ab su sculptor), un fontana ubi on vide quatro statuas. In illo, duo homines e duo feminas, le quales representa le cursos de aqua del region, con inscriptiones de lor nomines latin: Nemausa, Vardo, Ura e Rhodano.

Mais on non pote ignorar le importante architectura ecclesiastic, ubi nos ja ha nominate le importante construction romanic Cathedral de Nostre Seniora e Sancte Castor, nominate post le sancto local, e ubi on trova anque altere bel edificios, como le eclectic Ecclesia de Sancte Perpetue e Sancte Felicitate, o le neo-gothic Ecclesia de Sancte Baudilo.

Sed le Esplanada non es le unic loco ubi lo classic e lo moderne se fusiona. In celle bel Arenas re le qual nos parlava ante, e ben que on non plus pote organisar luctas de gladiatores, il ha loco le principal attraction del festivitate Feria de Nimes, un festival dedicate al tauromachia: le corridas, ubi moderne gladiatores lucta contra animales, in iste caso le terrific tauro.

Gastronomia

Si vos ancora non son convincite a visitar Nimes e su beltates urban, forsan io pote attraher vostre gusto vocante al placer de vostre palatos. Un specialitate, non solo de Nimes, mais de tote le region sud oriental de Francia e del oriente espaniol, es le brandade de gado, un deliciose platto de gado salate con oleo de oliva e patatas. Vostre repasto poterea ser accompaniate per alcun vinos (securmente vos ja sapeva quanto famose es Francia per su vinos), como le dulce Maury o le rosées sic del appellation Tavel.

Conclusion

Per summarisar, sia o per incantar vostre oculos e vostre imagination con le sculpturas, amphiteatros, parcos e edificios religiose, o per incantar vostre spiritus e palatos con le Feria e le gastronomia provencial, io vos consilia visitar le Roma de Francia, Nimes, nam un viage ci es un immersion in le historia vivente.