Le presentia del intellectual reactionari Victorio Dalmieri disfrena un altercation in le universitate capital que continua al Assemblea National

Alcun septimanas retro, le nova se extendeva per le retes rapidemente: le Union de Studentes Libere organisarea un conferentia titulate Identitate e destino national al Universitate Augusto Valdeneri, con le intervention stellar del intellectual de dextra dur Victorio Dalmieri.

Iste mercuridi, Dalmieri debeva presentar se al universitate con un equipa de securitate personal private, previdente un forte opposition a su presentia per grande parte del alumnos.

Le Universitate Augusto Valdeneri (UnAV) es famose per su character progressista. Conta inter su professores con le intellectual de sinistra Alexandro Brivani e, antiquemente, con le ora deputato per le Partito Communista Julio Terracini.

Le conferentia non finalisava secundo le programma. Le altercation causate per le Fronte Universitari Feminista obligava ad un intervention policial e a clausurar le salla de conferentias ante que Dalmieri finiva su lectura.

Victorio Dalmieri

Le intellectual es in un tour per le publication de su ultime libro: Ordine, veritate e tradition. Ibi le autor defende, inter alie, le proprietate private, le familia traditional e le binarismo sexual.

Con plus de 100 000 sequitores in retes, Dalmieri da voce ad un importante population liberemarian. E non solo, nam su activitates se extende ad altere paises. Anque como parte de iste tour, le autor ha essite invitate al Universitate de Genova e al Universitate Costa Azur.

Le altercation

Al comenciamento, le situation non pareva ser tanto bellicose. Il habeva un gruppo organisate foras del conferentia critante consignas contra le presentia del intellectual reactionari, mais le conferentia poteva comenciar. Dum le turno del questiones e ubi Dalmieri confrontava argumentativemente alcun alumnos, le tension prendeva un grandor periculose.

Le relation facte de lo evenite differe inter le distincte gruppos studiantil, mais il pare que le situation explodeva quando un alumno trans decideva debatter Dalmieri re le binarismo. Quando Dalmieri respondeva con un «tu inganna nemo, fra. Illo protubera troppo», le alumno, qui se identifica como femina, jectava un latta de Coca Cola al scenario, mais que non impactava Dalmieri. Post isto, alcun studentes del union organisante attaccava le alumno agressor.

Quando le novas exiva del salla, le Union de Studentes de Sinistra essayava irrumper e luctava con le policia.

Le rector interveneva petente le clausura del salla e le dispersion de omnes.

Duo studentes finiva in le hospital e le reparationes ascende a circa 10 000 euros. Le salla de conferentias require un renovation quasi total e le corridor principal ha essite totalmente vandalisate.

Alexandro Brivani ha declarate que le alumnos ha le derecto de protestar pacificamente, mais non de crear un chaos como celle que habeva loco. E se plangeva del attitude bellicose que Dalmieri traheva al universitate.

Reaction del assemblea

Dum le session del Assemblea de heri, le Ministro del Interior e del Securitate Public Richardo Balzani, del Partito Reformista, ha presentate un motion de condena del attaccos studiantil.

Le partitos del governamento, assi como le deputato agrarista e le gruppo liberal, ha appoiate iste motion.

Terracini, deputato communista, ha emittite le unic voto contrari e ha attaccate le partitos del governamento, declarante que illes son a normalisar le discurso ultra e reactionari de Dalmieri.

Le responsa del gruppo reformista ha essite interrumpite per le deputato rubie, qui ha vocate al gruppos socialista e verde de star contra le avantiamento del fascismo.

Ravennati, presidente del Assembela, interveneva dicente: «Deputato Terracini, vos non ha le parola. Io vos adverte: que vos respecta le ordine del Salla».

Terracini accusava le Partito Popular de lassar le reformistas controllar le institutiones e Ravennati prosequeva: «Seconde admonition: si vos persevera, io essera obligate a retirar vos le parola e a tomar mesuras disciplinari».

Terracini ha tunc abandonate le salla.

reaction del presidente peres

Carlo Peres ha justo hodie facite alcun declarationes, lamentante le eventos del UnAV e del Assemblea National, e ha allertate contra le polarisation e le recurso a mesuras violente. Ille ha vocate tote le fortias democratic ad unir se contra omne typo de attaccos al institutiones del nation, qualcunque sia le origine.

Iste incidentias del UnAV e le confrontation in le Assemblea revela un clima politic sempre plus polarisate in Liberemar. Le universitates deveni terreno de battalia symbolic, e le institutiones legislative reflecte iste tension in forma de rhetorica exacerbate e rupturas de protocollo. Le reaction majoritari in favor del condemnation monstra un consenso minime pro preservar le ordine democratic, sed anque le fragilitate del equilibrio inter libertate de expression, activismo e securitate public. Como tal, le caso del UnAV es un symptoma de un fractura que cresce.