Salute!

So Eduardo Ortega González, celle homine elegante del photo. E so felice a vider que tu ha arrivate ci. Lassa me compartir un poco re qui so e mi passion pro le creation.

Viage litterari

Io nasceva le 12 de februario 1995 in Las Palmas de Gran Canaria, Espania. Io scribe desde le etate de sedece annos, e dece annos plus tarde, in 2021, io publicava mi prime romance, La Sombra del Ministerio: La Captura, sequite per un collection de poemas, Memorias e impresiones, le anno sequente. Celle ipse anno, io habeva le honor de ser proclamate victor del Prime Concurso de Poesia Microamicro e recipeva un Mention Honorabile in le Secunde Concurso International de poesia con le strophe Julia.

In 2024, io finiva mi prime production litterari in interlingua, le triptycho narrative Le Silva Magic, un conto de fees ubi le mundo de Axanéth e le lingua bhrenaynòm son introducte.

Memoria

In 2020, con le infame quarantena, io me trainava con alcun potente utensiles mnemotechnic e consequeva memorisar plus de 3000 digitos de pi e plus de 3600 de e.

In Januario de 2025, post cinque menses foras del mundo del memorisation, io decideva participar in le Campionato Aperte de Memoria de Francia, que habeva loco in Paris. Ibi, post sex septimanas de trainamento, io consequeva batter cinque records national. Quatro de illos in disciplinas individual (so ora le possessor del records national de Cartas in dece minutas, Binarios in cinque minutas, Parolas in cinque minutas, e Imagines in cinque minutas) e le de punctuation maxime in un formato national.

Preter le pluma e le memoria

In addition al scriptura e le mnemonismo, io ama haber longe promenadas, studiar linguas e jocar scaccos.

Mi interesse pro musica e YouTube es anque un parte de mi vita. In 2023, io initiava mi viage sur YouTube con un canal re cultura e linguas in varie linguas, que plus tarde evolveva in un canal de creation de contento in Interlingua. In celle canal, tu pote trovar plure cantos original—composte e producte per me—principalmente in Interlingua. Mais non solmente: ecce un cantion de amor in anglese publicate pro le Die de Sancte Valentino de 2024.

Education e exploration linguistic

Io me graduava como philologo hispanic per le Universitate de Las Palmas de Gran Canaria (o, como nos, studiantes e graduates, lo nomina: la uelepegesé). Io parla sex linguas: espaniol, anglese, interlingua, italiano, portugese e francese.

Depois, io approfundava mi formation obtenente un certificato TEFL (Teaching of English as a Foreign Language). Preterea, io amplificava mi cognoscimentos con un curso de neurobiologia per le Universitate de Chicago.

Non oblida controlar le servicios professional que io offere. 😉

Mi fascination pro le linguistica e le litteratura me inspirava a crear mi proprie lingua fictional, bhrenaynòm.

Projectos actual e futur

Actualmente, io labora sur tres projectos de scriptura. Le prime es un traduction de contos in Interlingua titulate Dece Contos Hispanic. Le secunde es La Gema del Éter, un romance de phantasia epic. E le tertie es un libro de technicas de memoria, Desbloquea tu mente. Tanto Le Silva Magic como La Gema del Éter ha loco in un mundo fictional epic: le vaste e magic planeta Axanèth, que so a construer gradualmente.

Io spera que iste breve introduction ha suscitate tu curiositate. Uni te a me in iste viage creative! Io spera vider te usualmente!